Молитва о даровании ребенка.

Молитва

О, прехвальная и праведная мати Софие, Суздальския страны досточудная подвижнице! Славим твое богоугодное житие, чтим твоя великия добродетели, поклоняемся честным мощем твоим, с любовию лобызаем твой святый образ и с верою приносим тебе прилежныя наша молитвы. Помози нам, яко странним и пришельцем в мире сем, стати на истинный путь христианскаго жития, не отврати лица своего от всех прибегающих к твоему покровительству, духовне умудри подвизающихся в иночестве познати коемуждо образ спасения своея души, настави в подвизех смирения, терпения и покаяния, поспешествуй стяжати нам целомудрие, послушание и любовь Божию. Буди щит и ограждение обители сия от всякаго зла, в ней же сама ревностно подвизалася еси. Обрати и вразуми заблудшия люди на путь правый. Умоли Господа сил пощадити души наша и даровати нам время на покаяние, да твоим предстательством сподобимся безпагубне прейти поприще многоскорбнаго нашего земнаго жития и быти причастники вечнаго блаженства в небесных обителех Бога и Спаса нашего, Ему же подобает всякая слава, честь и поклонение, ныне и присно, и во веки веков. Аминь.